Третий

Холст, масло. Размеры 70х70см

Үчинчи
Киндигини өзи кәскән аниси,
"Сөйүнчә"дәп аңлатмиди хуш хәвәр.
Тәшвиш ичрә әзән ейтип атиси,
Пәрзәндигә исим қойған шу сәһәр.

Пинһан бәхти, анисиниң омиғи,
Ят көзләрдин йошурунар у чаққан.
Һөжжити вә һоқуқи йоқ периштә,
Туғулуштин чөчүш илкидә баққан.

Ака-һәдә арқисидин әгишип,
Һойла атлап чиқалмайду бу гөдәк.
Туғулушқа һоқуқи йоқ "үчинчи",
Оюн билмәс пәқәт мөкүштин бөләк.

Ғәлитә заң – чәк қоюшқан туғутқа,
"Үчинчигә" мәхпий яшаш несипкән.
Жулуп елиш ата-ана бағридин,
Явузларға адәттики бир ишкән.

Гөдәк үчүн шуңа адәт-қаидә,
Йочун кирсә шуңғар көрпә астиға.
Сирин сақлап бәхитсиз бир аилә,
Үчинчисин пинһан сөйүп, асриған.

Ғәмкин ана, дилда амма үмүти,
Пәнжиридин чушкән йоруқ нур кәби,
Мәхпийликтин азат болуп "үчинчи",
Һаман бир күн азадә яшар сәби.

Муәллипи Гүлназ Сәйдуллаева,
шеир рәссам Гүлназ Турсунниң "Үчинчи" намлиқ рәсимигә йезилған.